Fjármögnunarleigusamningar byggja á því að kaupandi tækis semur við SP-Fjármögnun um að greiða það niður með leigugreiðslum í ákveðinn tíma. SP-Fjármögnun er því eigandi tækisins á meðan á leigutíma stendur, en leigutaki hefur fullan umráðarétt yfir því á meðan.

 

Leigutaki tryggir tækið í sínu nafni og greiðir öll eðlileg gjöld af því, eins og t.d. bifreiðagjöld og þungaskatt, ásamt öllum kostnaði vegna viðgerða eða skemmda.

Þegar gerður er fjármögnunarleigusamningur er öll leigugreiðslan gjaldfærð og atvinnutækið því í raun afskrifað (gjaldfært) að fullu á leigutímanum. Þetta hefur þá kosti í för með sér að greiðsla á tekjuskatti frestast ef leigutíminn er styttri en venjubundinn afskriftartími atvinnutækisins.

 

SP-Fjármögnun greiðir kaupverðið með virðisaukaskatti. Leigan reiknast af kaupverði án virðisaukaskatts en virðisaukaskattur leggst á hverja leigugreiðslu. Leigutaki fær virðisaukaskattinn endurgreiddan sé hann með virðisaukaskattskyldan rekstur.

Munurinn á fjármögnunarleigu og kaupleigu felst því einkum í mismunandi bókhaldslegri og skattalegri meðhöndlun, en kjör þeirra eru hin sömu.

HVERJUM HENTAR FJÁRMÖGNUNARLEIGA ?

• Fjármögnunarleiga hentar þeim best sem hafa skattskyldan rekstur og geta nýtt sér gjaldfærslu á leigugreiðslum til lækkunar á skatti. Innborgun kaupanda er hægt að gjaldfæra strax.
• Hafi kaupandi ekki skattskyldan rekstur eða tækið er ekki klárlega til atvinnureksturs hentar kaupleiga betur.
• Fjármögnunarleiga hentar einnig rekstraraðilum sem ekki vilja binda of mikið rekstrarfé. Hún hentar afar vel stórum jafnt sem meðalstórum fjárfestingum.
• Almennt má segja að því meiri sem hagnaður er, þeim mun betri kostur er fjármögnunarleiga, því hún hefur í för með sér lækkun á bókhaldslegum hagnaði og þar af leiðandi lægri skatta.